SU CONTU DE SA ROSA

SU CONTU DE SA ROSA ´E CHENTU FOZZAS - ROSA ´E MAGGIU - ROSA ANTIGA (Rosa centifolia)

Su frore, da pagu prus a mancu, est tundu, gasi sempere de colore rosa. Est cumpostu de chentu fozzas e prus; e tenet unu fragu delicadu e bellu. Sas calidades connotas sunt prus de chentu. Froridi in su mese ´e maggiu e creschede in cale sisiat logu. Dae ´nue siat bennida sa rosa de chentu fozzas non s´ischidi. Sos antigas gregos naraint chi Clori sa dea de sos frores, pro la poder criare, na´chi haiat pedidu azudu a sos ateros deos. Apollo na´chi li haiat dadu s´isplendore, Afrodite sa bellesa, Dionisiu su fragu bellu, sas tres Grassias sa grassia e Zeffiru una fortuna eterna e crara comente su chelu sena nues. A sa matessi manera est sa paristoria de s´ozu ´e rosa: in su riu de su giardinu de su palattu reale na´chi b´haiant bettadu abba ´e rosa chi su calore de su sole na´chi tiat haer fattu chirrare s´ozu dae s´abba. So persianos, de zertu, cunsideraint sa rosa comente su mezzus frore. Diffatis pro sas festas nde ispravinaint sas carrelas. Diffatis sos persianos sun ´istados sos primmos a fagher s´abba ´e rosa (abbardente). E dae tempos e tempos la ´endiant in tottu su mundu assoras connottu, finzamentas in Sardigna. In medas logos de su Mediteraneu, oe chi est oe, si usat de rezire sos istranzos ispunzolandelos cun abba ´e rosa. Cun sa rosa si faghent profumos e fummentos, duches e mandigos e rosolios. So rosoliu de rosa (rosoliu cheret narret ozu de rosa) est istadu inventadu dae sos padres, in tempos antigos, faghende fremmentare e posca passare in su linbiccu sas fozzas de sa rosa. «Si has duos soddos negusciadinde unu pro su pane, cun s´ateru comporadi una rosa pro s´amima tua» narait unu poeta persianu, prus de milli annos como, chi teniat in meda considerazione custu frore. Modos de narrer: Friscu che rosa, Bella comente una rosa.